ਜਨਤਾ ਦੇ ਪਿਆਰ ਤੇ ਵਿਸ਼ਵਾਸ ਸਦਕਾ ਜਿੱਤ ਹਾਸਿਲ ਕਰਕੇ ਸਰਬ ਪੱਖੀ ਵਿਕਾਸ ਕਰਵਾਵਾਂਗੇ - ਮਨੀਸ਼ ਬਾਂਸਲ

ਮਨੀਸ਼ ਬਾਂਸਲ ਦੇ ਹੱਕ ਵਿਚ ਬਰਨਾਲਾ ਦੇ ਵਾਰਡ ਨੰਬਰ 6 ਅਤੇ 31 ਦੇ ਇਕੱਠ ਨੇ ਖੜ੍ਹੀ ਕੀਤੀ ਲੋਕ ਲਹਿਰ

ਬਰਨਾਲਾ: (ਅਮਨਦੀਪ ਸਿੰਘ ਭੋਤਨਾ/ਕਰਮਜੀਤ ਸਿੰਘ ਗਾਦੜ੍ਹਾ) ਹਲਕਾ ਬਰਨਾਲਾ ਵਿੱਚ ਜਿੱਥੇ ਕਾਂਗਰਸ ਪਾਰਟੀ ਟਿਕਟਾਂ ਦੀ ਦੇਰੀ ਕਾਰਨ ਪੱਛੜ ਗਈ ਸੀ ਸ਼ਹਿਰ ਅਤੇ ਆਸ ਪਾਸ ਦੇ ਮਾਹੌਲ ਤੋਂ ਇਸ ਤਰ੍ਹਾਂ ਲੱਗਦਾ ਸੀ ਕਿ ਕਾਂਗਰਸ ਪਾਰਟੀ ਅਜੇ ਕਿਸੇ ਟੱਕਰ ਵਿੱਚ ਨਹੀਂ ਹੈ। ਪਰ ਹੁਣ ਕਾਂਗਰਸ ਪਾਰਟੀ ਦੀ ਸਥਿਤੀ ਬਾਂਸਲ ਪਰਿਵਾਰ ਅਤੇ ਕਾਂਗਰਸੀ ਵਰਕਰਾਂ ਦੀ ਸਖ਼ਤ ਮਿਹਨਤ ਕਾਰਨ ਸੁਧਰਦੀ ਨਜ਼ਰ ਆ ਰਹੀ ਹੈ। ਹੁਣ ਬਰਨਾਲਾ ਹਲਕਾ ਵਿਖੇ ਤਿਕੋਣੀ ਟੱਕਰ ਸਾਫ਼ ਨਜ਼ਰ ਆ ਰਹੀ ਹੈ।

ਜਿੱਥੇ ਪਵਨ ਬਾਂਸਲ ਵੱਡੇ ਕੱਦ ਦੇ ਨੇਤਾ ਹਨ ਉਥੇ ਹੀ ਮਨੀਸ਼ ਬਾਂਸਲ ਮਿਲਾਪੜੇ ਅਤੇ ਮਿੱਠੇ ਸੁਭਾਅ ਕਾਰਨ ਲੋਕਾਂ ਵਿੱਚ ਹਰਮਨ ਪਿਆਰਾ ਹੁੰਦਾ ਜਾ ਰਿਹਾ ਹੈ। ਅੱਜ ਮਨੀਸ਼ ਬਾਂਸਲ ਨੇ ਬਰਨਾਲਾ ਦੇ ਪੱਤੀ ਰੋਡ ਵਿਖੇ ਵਾਰਡ ਨੰਬਰ 6 ਅਤੇ 31 ਜੋ ਐਮ ਸੀ ਜੌਂਟੀ ਮਾਨ ਅਤੇ ਵਿਨੇ ਕੁਮਾਰ ਵੱਲੋਂ ਰੱਖੇ ਸਾਂਝੇ ਪ੍ਰੋਗਰਾਮ ਵਿੱਚ ਸ਼ਿਰਕਤ ਕੀਤੀ।

ਉਥੇ ਉਹਨਾਂ ਵੱਲੋਂ ਜਿੱਥੇ ਵੋਟਰਾਂ ਨੂੰ ਸੰਬੋਧਨ ਕੀਤਾ ਉੱਥੇ ਹੀ ਉਹਨਾਂ ਵੱਲੋਂ ਬਰਨਾਲਾ ਹਲਕੇ ਦੇ ਵੋਟਰਾਂ ਵੱਲੋਂ ਮਿਲ ਰਹੇ ਪਿਆਰ ਲਈ ਧੰਨਵਾਦ ਕੀਤਾ। ਉਹਨਾਂ ਕਿਹਾ ਮੈਂ ਤੁਹਾਡਾ ਬੇਟਾ ਹਾਂ ਮੈਂ ਤੁਹਾਡੇ ਹੀ ਇਲਾਕੇ ਦੇ ਖਾਨਦਾਨ ਦਾ ਵਾਰਸ ਹਾਂ ਮੇਰਾ ਮੋਹ ਆਪਣੇ ਹੀ ਇਲਾਕੇ ਨਾਲ ਜੁਡ਼ਿਆ ਹੋਇਆ ਹੈ, ਮੈਂ ਤਾਂ ਹੀ ਤੁਹਾਡੀ ਸੇਵਾ ਕਰਨ ਆਪਣੇ ਇਲਾਕੇ ਵਿਚ ਵਾਪਸ ਆਇਆ ਹਾਂ ਉਹਨਾਂ ਕਿਹਾ ਤੁਸੀਂ ਮੈਨੂੰ ਜਿਤਾ ਕੇ ਵਿਧਾਨ ਸਭਾ ਭੇਜੋ ਮੈਂ ਆਪਣੇ ਇਲਾਕੇ ਦੀ ਨੁਹਾਰ ਬਦਲ ਦੇਵਾਂਗਾ। ਇਸ ਮੌਕੇ ਉਹਨਾਂ ਵੱਲੋਂ ਐਮ ਸੀ ਜੌਂਟੀ ਮਾਨ ਅਤੇ ਵਿਨੇ ਕੁਮਾਰ ਦੀ ਅਗਵਾਈ ਵਿੱਚ ਵੱਡੀ ਗਿਣਤੀ ਵਿਚ ਨੌਜਵਾਨਾਂ ਨੂੰ ਕਾਂਗਰਸ ਪਾਰਟੀ ਵਿੱਚ ਸ਼ਾਮਲ ਕੀਤਾ। 

ਇਸ ਮੌਕੇ ਉਹਨਾਂ ਨਾਲ ਕੁਲਦੀਪ ਸਿੰਘ ਕਾਲਾ ਢਿੱਲੋਂ, ਸਾਂਝਾ ਆਸਰਾ ਵੈੱਲਫੇਅਰ ਸੋਸਾਇਟੀ ਦੇ ਪ੍ਰਧਾਨ ਰਣਜੀਤ ਸਿੰਘ ਮਰਾਹੜ, ਭੋਲਾ ਜੱਸਲ, ਐਮ ਸੀ ਦੀਪਮਾਲਾ, ਮਹਿਲਾ ਕਾਂਗਰਸ ਪ੍ਰਧਾਨ ਸੁਖਜੀਤ ਕੌਰ ਸੁੱਖੀ, ਮੰਜੂ ਬਾਲਾ, ਮੈਡਮ ਗੁਰਬਖਸ਼ ਰਾਵਤ ਐਮ ਸੀ (ਜਨਰਲ ਸੈਕਟਰੀ ਕਾਂਗਰਸ ਪਾਰਟੀ ਚੰਡੀਗਡ਼੍ਹ) ਆਦਿ ਹਾਜ਼ਰ ਸਨ। - News Today Punjab